:: Þvaðurveita geimVEIRU ::

:: þriðjudagur, nóvember 09, 2004 ::

Oil up your butthole
Þetta viðskiptalíf okkar er svo dapurt að mann langar að flýja land. Stórlaxarnir í olíufélögunum sem blóðmjólkað hafa neytendur skammlaust hafa makað krókinn, keypt kvóta og hlutabréf, endurskipulagt og hagrætt svo heilu sveitarfélögin eru að kafna. Svo fer hið sama fjármagn úr landi og allir syngja hinum bráðskörpu stjórnendum lofsöngva. Það er úr vasa okkar, aumu meðalmannanna, sem leikpeningar þessa Matadorspilara komu. Það er úr vasa okkar, sem erum að kafna yfir rekstri einkabíls, sem gróðinn hefur sprottið. Það er úr vasa okkar, sem nöldrað hafa í fjölmörg ár um snarpar hækkanir eldsneytis en hægfara verðlækkanir að sama skapi, sem fjármagn fyrir umbyltingu bensínstöðva undanfarin ár hefur komið þar sem smám saman er verið að ýta bensínafgreiðslumönnum út.
Ég hef alla tíð borgað þær aukakrónur sem kostar að kaupa þjónustu afgreiðslumanns á bensínstöðvum, þar sem ég er því mótfallin að einungis verði hægt að kaupa eldsneyti í sjálfsölu. Nú sér maður að peningurinn fyrir allsherjaryfirhalningu velflestra, ef ekki allra bensínstöðva yfir í að verða hverfisverslanir sbr. 7-11, nýbyggingarnar og lengdi afgreiðslutíminn hefur ekki verið nema að hluta til vegna góðæris og góðrar stjórnunar fyrirtækjanna, ekki nema að hluta til vegna þess að aukið þjónustustig skilaði ánægðari viðskiptavinum, ekki nema að hluta til þar sem að vegavinnukofarnir sem höfðu verið látnir duga í tugi ára voru orðnir skaðlegir fyrir ímynd fyrirtækja sem auglýsa stanslaust og taka þátt í allskyns samböndum tengdri fjárfestingum í viðskiptavild s.s. safnkortið og hvað það heitir allt saman. Þetta er byggt á grunni fleiri milljarða króna sem viðkomandi fyrirtæki hafa með ólögmætum hætti dregið að sér með því að leyfa sér að skrifa sín eigin lög og reglur þar sem svona rík fyrirtæki þurfi ekki að fara að lögum eins og allir aðrir.

Loksins er búið að taka eitthvað á þessu. Loksins er hægt að sanna hvernig þeir fóru að þessu. Það þurfti ekkert minna til en að lögregluyfirvöld færu inn með leitarheimild og hirtu gögnin og gífurlega vinnu sem eflaust hefur kostað ríkið formúgu, til þess að hægt væri að fá þetta upp á borð. Dómsyfirvöld eiga vissulega eftir að skera úr endanlega um málið, en neytendur vita alveg hvernig liggur í þessu og eru vitaskuld reiðir. Okkur er öllum misboðið, þess vegna er ekki nema sjálfsagt að á meðan aðrar eins ásakanir eru uppi, að borgarstjóri taki hatt sinn og staf, ekki vegna þess að hann sé svo bullandi sekur (sem á eftir að meta á réttum stöðum) heldur af því að embættið á að vera hafið yfir slíkar ásakanir. Samkeppnisyfirvöld eru ekki hver sem er, heldur stofnun sem samfélagið felur nauðsynlegt eftirlit. Þetta var framkvæmt á hálfmisheppnaðan hátt að Þórólfur færi, sem mig grunar að hafi verið leið sem hafi ekki verið frá honum komin, en hann meiri maður fyrir vikið að halda haus og stíga niður nú en ekki síðar. Vinstri græningjar fá alveg prik fyrir að hafa verið samviskustrumpur R-listans. Ekki í fyrsta skiptið.

Það tístir í mér að út um allt séu stórlaxarnir að draga sig til hlés, en samt er mín tilfinning að þetta sé ekki nálægt því nóg. Það eru sömu menn í stjórnum út um allt alveg hreint og þá einmitt í hinum einokunarfyrirækjunum og mig grunar að ef hægt verður að rekja þennan illa fengna auð komi margt alveg svakalegt í ljós. Allt samfélagið hefur síðan verið ranglega reiknað upp þar sem eldsneytisverð hefur sitt að segja í neysluverðsvísitölu sem hefur áhrif á skuldir heimilanna, gróðinn vegna samráðsins hefur í öllum talnaleiknum komið út sem gróði sem fjárfestur var hægri vinstri og til að styrkja stöðu stórlaxanna og tryggja yfirráð sem víðast, lífeyrissjóðir eiga eflaust í olíufélögunum svo kannski hefur eitthvað skilað sér þannig til okkar. Að öðru leyti vorum við rænd.

Rænd og tekin í taðgatið. Skítt.

:: geimVEIRA:: kl. 19:14:: [+] ::
...